P55 million pesos’ nga pondo para sa Kalibo Public Market, ginakabaeak-an nga ibalik sa national treasury

KALIBO, AKLAN—Ginakabaeak-an nga ibalik sa national treasury do Php 55 million pesos nga para sa pagpaobra it Kalibo Public Market.

Raya hay bangud nga owa pa gihapon naresolba do relocation site ukon do pagasayluhan nga lugar para sa mga market vendors it LGU Kalibo ngani nga indi man maumpisahan do pagpatindog kara.

Sa regular session it Sangguniang Bayan Kalibo, ginpahayag ni Aklan DPWH District Engineer Alejandro Ventilacion nga dapat naumpisahan eon ku buean pa it Nobyembre 2020 do proyekto sa nasambit nga tindahan apang makataliwan do limang buean hay owa sa gihapon naresolba do pagasayluhan it mga vendors ngani nga nag-request eon do contractor it mutual termination of contract.

Suno pa kay Engr. Ventilacion, do Php 40 million sa nasambit nga pondo hay halin sa Annual Invest Plan (AIP) it opisina ni Aklan 1^st district Representative Carlito Marquez ag do 10M ag 5M hay indi masayuran kung siin maghalin ag nagguwa eamang sa Generals Appropriation Act it DPWH.

Samtang, nakataeana man nga imbitahan it uman do district engineer sa igapatigayon nga Committee hearing it SB Kalibo para masayuran kung may una pa baea nga pamaagi agud nga maeagas do nasambit ng pondo ag indi raya mabalik sa pambansang kaban ng bayan. // SHERRY ANNE REUNIR-VIDAL