Ipinagtanggol ni Defense Secretary Gilbert Teodoro ang pagkakaroon ni Vice President Sara Duterte ng mahigit apatnaraang security escorts.
Sa pagdinig ng House Appropriations Committee sa proposed budget ng Department of National Defense, kinumpirma ni Teodoro na naglaan ang ahensya ng 75 million pesos para sa 345 security escorts ng pangalawang pangulo.
Mayroon aniyang kabuuan na 433 non-plantilla o detailed personnel sa ilalim ng Vice Presidential Security and Protection Group o VPSPG.
Paliwanag ni Teodoro, kaya umabot sa mahigit apatnaraan ang escort ay dahil sa advance locations na pinupuntahan ni Duterte, sa tungkulin bilang kalihim ng Department of Education, rotation ng mga staff at suporta sa kanyang tanggapan.
Sinagot din ng kalihim ang pagkuwestyon ni ACT Teachers Representative France Castro sa hindi pagkakabilang ng pondo ng VPSPG sa proposal ng DND.
Giit ng DND chief, ang VPSPG funding ay sub-allocated lang sa ilalim ng General Headquarters – Armed Forces of the Philippines budget.
Una nang sinabi ni Duterte na kulang sa basehan at katawa-tawa ang pagkukumpara sa security detail ng mga nakalipas na bise-presidente dahil may iba pa siyang tungkuling ginagampanan.