Mokabat sa P8,000,000.00 kantidad sa iligal nga droga ang nasabat sa hiniusang pwersa sa otoridad dungan sa gipatumang buy buy-bust operation sa Prk. Tambis, Brgy. Cagangohan, Panabo City pasado ala una sa hapon kagahapon.
Duha ka mga suspek ang nadakpan nga giilang sila si Roy Matulac Matabiog alyas Poloy, 40-anyos ug Ranulfo Angoy Sacayan Jr., 35 anyos nga parehong residente sa Prk. 3D, Luzviminda Subd., Brgy. San Francisco, Panabo City.
Ang duha positibong napalitan sa poseur buyer og shabu balor onse mil pesos hinungdan nga dali silang giposasan.
Narekober gikan sa ilang posisyon ang 11 ka pakete sa gitoohang shabu motimbang og kapin 500 gramos dunay estimated value kapin P8-milyones pesos.
Gikustodiya na sa PDEA Davao del Norte ang mga dinakpan nga mag-atubang sa kasong paglapas sa Seksyon 5 ug Seksyon 11 sa R.A. 9165 o Comprehensive Dangerous Drug Act of 2002 lakip ang nakuhang ebidensya alang sa hustong disposisyon.
Ang malampusong operasyon gilusad sa Panabo City Police Station, PIU-Davao Norte PPO ug PDEA Davao del Norte. BNFM-Davao
