LEGAZPI CITY – Kinumpirmar kan Land Transportation Franchising and Regulatory Board (LTFRB) Bicol na an issue sa pagphase out nin Public Utility Jeepneys (PUJ) ngunyan sa katapusan nin 2023, wara pa nin linaw.
Ini an sinabi ni LTFRB Bicol OIC Regional Director, Paul Vincent Austria sa Brigada News FM Legazpi.
Segun kay Austria, dapat abangan na sana an posibleng mangyayari kun madadagos an pagphase out nin PUJs sa nasyon.
An pigsasabi su boot kan central office manungod sa issue na an huring aldaw kan paggamit kan nasambit na lunadan iyo an deadline para sa consolidation o pagbilog nin kooperatiba.
Segun pa sa ospisyal, nagsagibo na man sinda nin paglibot sa rehiyon tanganing makipag-olay asin magkaigwa nin forum sa mga operator asin driver dapit sa nagdadangadang na pagphase out kan PUJs asin pag-enganyar saindang magkua nin modern jeep.