Pagbaha nasinati sa Davao City

Nakasinati og halapad nga pagbaha, pagsaka sa lebel sa tubig sa mga nag-unang kasapaan sa dakbayan sa Davao human sa halos tunga sa adlaw nga pagbnunok sa ulan kagahapon.

Base sa mga naunang abiso sa CDRRMO, nakasinati og Intertropical Convergence Zone (ITCZ) ang syudad hinungdan sa mga kasarangan hangtud sa kusog nga pagbundak sa ulan sa mga lugar sa Paquibato, Calinan, ug Talomo Districts, samtang ang ubang lugar makasinati og madag-umon nga kalangitan.

Ang lebel sa tubig sa Matina River sa Brgy Matina Crossing ug Talomo River sa Barangay Talomo Proper niabot sa Red o critical level samtang ang Bunawan River nakaabot sa Code Orange (Warning Level) kagahapon apan nihupa kini.

Gawas sa kasapaan gibaha usab ang ubang dalan sama sa Purok 11, Calachuchi street, Mintal  ug Diversion Road sa Maa nga nisubay na sa dalan ang tubig baha.

Tungod niini usa ka sakyanan ang nadisgrasya sa Bypass Road apan luwas ra ang sakay niini.

Kalabot niini gibutyag sa  PAGASA nga padayong nipasulabi og mabatyagan ang epekto sa low pressure area (LPA) nga midungan sa  Intertropical Convergence Zone o ITCZ.

Sumala kay PAGASA weather specialist Ariel Rojas, ulahing nabantayan ang LPA sa gilay-ong 495 kilometers Sidlakang bahin sa Davao City bandang alas tres sa hapon apan gamay an tsansa niini nga mahimong bagyo sa musunod nga 24 oras.

Subayon niini ang direksyong Kanluran Hilagang-Kanluran paduol sa Mindanao ug posibleng matunaw  ra kung makaigo na sa kayutaan. BNFM-Davao

Leave a Reply

Your email address will not be published. Required fields are marked *