KALIBO, AKLAN—Paga-imbestigahan it Philippine Coastguard (PCG) do ginasugid nga pagbangga it barko sa sangka bangka sa territorial waters nga sakop it Capiz nga nangin rasun it pagkamatay it sangka mangingisda nga taga-Kalibo, Aklan.
Sa pakipag-angot it Brigada News FM Kalibo kay Mr. Terrence June Toriano, head it Municipal Disaster Risk Reduction and Management Office (MDRRMO) Kalibo, nagpadueong do tawuhan it PCG 6 sa Aklan kahapon para nga mag-imbestiga at makabuoe it dugang nga impormasyon halin sa daywang nakaeowas kamana man ginsekyar do gin-angkon nga kasamaran it fishing vessel.
Suno pa kana, ginapatihan nga do point of origin it barko hay Guimaras, Iloilo ukon Bacolod kung siin suno sa mga survivor nga do nasambit nga barko hay posibleng sangka cargo ship bangud nga may una raya nga crane sa ibabaw.
Kung madumduman, natabo do nasambit nga insidente ku adlaw it Sabado samtang nga nagapangisda do mga biktima sa kaeawuran sa tunga it Masbate ag Capiz kat ginapahayag nga sinunggaban it barko do andang ginasakyan nga bangka kung siin maswerteng nakaeowas sanday Gerald Retos ag Leo Arilas matapos nga buligan it pilang mangingisda nga maeapit sa lugar apang si Rex Peralta alyas Ricky, 57 anyos hay patay eon kat masapwan sa municipal waters nga sakop it Tangalan, Aklan kahapon. // SHERRY ANNE REUNIR-VIDAL