Naghitak pa gihapun ang paggamit ug pagpayuhot sa illegal nga droga sa Barangay Carmen ning syudad sa Cagayan de Oro.
Kini ang pag- angkon ni Peace and Order Committee Chairman ug Anti-Illegal Drugs Abuse Council Co-Chairman Barangay Carmen Kagawad Sunny Rae Cahayag atol sa pagkasikop sa usa ka sikad driver sa maong Barangay nga giila lamang nga si Alyas Lalal, 19 anyos.
Matud ni Kag. Cahayag, hangtud karon lisud pa gihapun makab-ot sa Barangay Carmen ang drug free Barangay.
Kini tungod kay usa ang Barangay Carmen sa syudad sa Cagayan de Oro nga daghan ang populasyon, ug daghan sab nga mga silingang Barangay ang diha magpahigayun og transaksyon sa illegal nga droga.
Gidugang pa nga ang uban sab nga naggamit sa illegal nga droga, dili mga residente sa Cagayan de Oro.
Taliwala sa naghitak pa gihapun nga transaksyon sa illegal nga droga sa Barangay Carmen, gibutyag ni Kagawad Cahayag nga padayun gihapun ang ilang hugot nga lakang ilabi na ang ilang preventive measures, information dissemination batok illegal nga droga ug intervention sama sa Community Based Drug Rehabilitation Program alang sa kampanya batok illegal nga droga sa Barangay Carmen.