LEGAZPI CITY – Napag-olayan na kan Department of Education (DEPED), provincial government asin kan mga lokal na gobyerno kan Tabaco City asin Malilipot, Albay an dapit sa posibleng relocation kan mga eskwelahan na nasa laog kan 6 kilometer permanent danger zone kan Mayon.
An mga eskwelahan na ini iyo an nasa Magapo sa Tabaco City asin Calbayog sa Malilipot.
Sa intrevista kan Brigada News FM Legazpi kay Alvin Cruz kan DEPED Albay, sinabi niya na an lokal na gobyerno kan duwang lugar, bukas man para digdi.
Alagad, saro su boot sa pinaka-concerns kan nasambit na mga LGU ngunyan an paghanap kan posibleng site na malilipatan kan mga ini.
Segun kay Cruz, bako man kaya madali an proseso sa paghahanap nin site asin bako man ura-urada.
Sa oras su boot na makapag-identipikar na ki mga lugar, nag-commit man an DEPED Central Office na matao nin suporta para sa pagkonstruhir nin mga bagong school buildings.