Opisyal eon nga nabatun it Aklan ro pagkilaea bilang Most Competitive Province sa bilog nga Western Visayas sa 2023 Cities and Municipalities Competitive Index (CMCI) Awards.
Ginpatigayun ro awarding ceremony ku, Oktubre 13 sa Grand Ballroom, Zuri Hotel, Mandurriao, Iloilo City kung siin personal rayang ginbatun ni Provincial Administrator Atty. Selwyn Ibarreta bilang representante ni Governor Jose Enrique ‘Joen’ Miraflores.
Raya eon ro pang an-um nga beses nga naangkon it Aklan ro nasambit nga pagkilaea halin pa ku 2016.
Ro Cities and Municipalities Competetiveness Index (CMCI) hay dag unan nga ranking it mga syudad ag munisipalidad sa nasyun nga ginhimo it National Competitiveness Council pinaagi it Regional Competitiveness Committees (RCCs) ag sa bulig man it United States Agency for Internal Development. // ANN DESLENE SALAZAR