Pagkolekta nin Septage fee kan LCWD pupunduhon na, mas baratong serbisyo, laoman – LGU Legazpi

BNFM BICOL—Dae na makolekta nin septage fee an Legazpi City Water District (LCWD) sa mga residente asin establisimiento sa syudad para sa pagpasupsop kan saindang mga poso negro poon ngunyan na Mayo.

Ini an ibinareta ni alkalde Noel Rosal sa paagi nin video na iniluwas kaini sa saiyang official facebook account.

Sigun sa alkalde, poon ngunyan na bulan, kakaputan na kan lokal na gobyerno an pagmanihar sa septage facility na nasa Barangay Banquerohan asin babayadan na sana an kontraktor sa investment kaini sa nasabing pasilidad alagad ibabawas na digdi an mga enot na naibayad kan syudad.

Katakod kaini, dae man suboot nin dapat ikahadit an mga nakabayad na sa laog nin duwa o tulong taon huli ta kapot kan LGU an listahan kan mga ini asin oras na mgangaipo sinda nin serbisyo sa pagpapasupsop nin poso negro, mag-apod sana suboot sa Office of the City Environment and Natural Resources  (OCENR).

Apwera kaini, igwa na suboot nin draft ordinance sa Sangguniang Panlungsod na katuyuhang pababaon an septage fee.

Kun dati, P6,000 an bayad para sa mga residential houses, gigibuhon na sana ining P4,500 kada siphon mantang para naman sa commercial establsihments, kun dati, P7,500, gigibuhon na sana ining P6,000.

Para naman sa mga nakahulog na nin maninigong kantidad sa paagi kan LCWD antes ining pinundo, libre na suboot an serbisyo kun sinda mapa siphon mantang balanse na sana an babayadan kan mga may naihulog na alagad bako pa maninigo para sa bilog na kantidad na kaipuhan bayadan.

Sigun sa alkalde, ginibo ninda ini ngani na mapagian an pang-arualdaw kan mga Legazpeño ngunyan na anasa tahaw nin pandemya an gabos. Nangapodan man si Rosal nin suporta sa saindang mga kababayan para sa nasabing proyekto na sigun saiya rekognisado kan Climate Change Commission bilang saro sa mga LGU na igwa nin Septage facility.###