Nagpagawas karon og abiso ang gikan sa Coast Guard Station Island Garden City of Samal alang sa mga nagkadaiyang matang sa sakyanan pangdagat nga magbinantayon labi pa nga dunay daut sa panahon.
Ang maong abiso base na sab sa gipagawas sa DOST-PAG-ASA alas-3:00 sa hapon kagahapon, Mayo 23, 2023 nga ang Super Typhoon Mawar ang makaapekto sa dakong bahin sa Mindanao labi na sa Davao Region, hinungdan nga gipahimangnuan nga mag-igmat o diba kaha likayan una ang paglawig sa kadagatan.
Makasinati sumala pa ang Davao del Norte ug Davao de Oro og katag-katag nga pag-ulan, pagpangalogdog, pagpangilat gumikan sa Southwesterly Windflow/ Localized Thunderstorms.
Gipahimangnuan sab ang mga nanimuyo daplin sa dagat o sapa o kadtong anaa sa low-lying areas, flood prones areas nga magbinantayon labi na nga halos taga-gabii makasinati og pag-ulan nga posibleng muresulta sa pagdahili sa yuta.