Pagpamakuna sa Lapu-lapu City, Cebu mo-resume na ugma

Gikatakda na nga mo-resume ugmang adlawa, Mayo 4, 2021 ang pagpamakuna sa mga  health workers  ug senior citizens sa Lapu-lapu City.

Mao kini ang gipasalig ni Lapu-lapu City Mayor Jonard Ahong Chan.

Basi kini sa gipagawas nga advisory ni Mayor Chan human nakadawat ang siyudad ug dugang suplay sa bakuna gikan sa Department of Health sa Central Visayas (DOH-7).

Samtang nanawagan siya sa mga tawong adunay comorbidities nga huwaton lang una ang advisory alang kanila.

Kini tungod kay wala pa silay schedule alang sa pagpamakuna sa mga adunay comorbidities sanglit mag-agad pa sila sa availability sa bakuna.

Kahinumduman nga niadtong Abril 24, gipahibawo ni Chan nga temporaryo nilang gihunong ang pagpamakuna human nahatag na nila ang unang dose sa  COVID-19 vaccines sa dul-an dos mil ka mga  senior citizens  ug human nahurot na usab nila sa paggamit ang vaccine supplies.