IPASUTA ni General Santos City Police Office Acting City Director, PCol.Jomar Alexis Yap ang report kalabot sa pagpamana sa mga motorista nga muagi sa Promise Land, Brgy. Mabuhay, Gensan.
Gibutyag sa nasampit nga opsiyal nga dili angay pasagdan ang susamang panghitabo tungod posible usab kining ikamatay sa mga maigo sa Indian pana ilabi na sa vital organs.
Sumala pa niini nga posibleng trip lamang kini sa pipila ka mga indibidwal o may mga dili maayong tumong sa mga motorista. Sumala pa niini nga angayang masayran kinsa ang nagpaluyo niini. Aminado usab ang nasampit nga opisyal nga posibleng lango sa droga ang mga gahimo sa susamang binuhatan.
Nihangyo usab si Yap sa media nga tabangan silang ipaabot sa katawhan nga isumbong gilayon sa mga estasyon sa kapulisan kung may makitang kadudahang indibidwal nga planong muhimo og susamang pagpamana sa mga motorista aron paspas nga masilutan ang mga suspek. I MJ Fernandez