Pagpanimalos posibleng hinungdan sa pagpusil-angol sa usa ka lalaki sa Barangay Fatima

PAGPANIMALOS ang unang gitan-aw nga motibo sa kapulisan kalabot sa pagpusil sa usa ka 23-anyos nga si Robert Monter Adolfo alas 6:30 ang takna sa gabie sa Purok 16 Block 2, Barangay Fatima Gensan Enero 24.

Kahibaloang sa inisyal nga imbestigasyon kanhing naapil sa Children in Conflict with the Law o CICL ang nasampit nga biktima sa mga nakalabay nga tuig og kanhing nalambigit sa kagubot ug mao kini ang gitanaw sa kapulisan nga hinungdan sa krimen.

Kahinumdumang na-angol ang biktima human makaangkon og samad pinusilan sa iyang panga. Si Robert Monter Adolfo ang residente sa Purok 13, Barangay Apopong ning dakbayan. Base sa initial nga impormasyon nga samtang anaa sa maong lugar ang biktima kalit mipatim-aw ang duha ka wala mailhing lalaki ug kalit nga gipusil ang biktima.

Human sa pagpamusil dali nga misibat palayo sa lugar ang mga suspek sakay sa usa ka motorsiklo. Gilayong nakapangayo og tabang kaniadto ang biktima ug gidala sa ospital ug anaa na sa maayong kahimtang human sa maong insidente.

Kasamtangan gapangalap pa og dugang impormasyon ang Fatima PNP alang sa posibilidad nga pag ila sa ilang mamahimong person of interest sa maong krimen. I MJ Fernandez

Leave a Reply

Your email address will not be published. Required fields are marked *