Hugot na nga ginbawalan sang pamunuan sang Barangay Baybay ang pagparking sang mga dalagkuan nga salakyan sa higad sang karsada agud malikawan ang anuman nga disgrasya.
Ini ang ginpahayag ni Punong Barangay Erwin Oroceo sang ma-interview sang Brigada News FM.
Suno kay Oroceo, madamo nga mga motorista kag beach/restaurant owner ang nagareklamo sa pagpark sang mga dalagkuan nga salakyan kasubong sang 10 wheelers kag container van sa amo nga lugar bangud nagatuga ini sang disturbo kag huol sa karsada.
Nahibaluan, ang nasambit nga mga trucking ang nagikan ukon magapadulong sa Culasi port, apang sa kilid sang karsada sa nasambit nga lugar nagapalipas oras samtang nagahulat sang barko nga nagabyahe.
Ginpahayag man ni Oroceo nga ginpangsita na nila ang mga driver sang truck nga indi na paghimuon nga parkingan ang amo nga lugar bangud ini ang delikado.
Dugang pa sang Kapitan, nga nagpangbutang na sila sang signage sa lugar. | Judy ann Juare