Duna nay person of interest ang mga personahe sa Bajada Police Station sa kamatayon sa usa ka kanhi Army, nga gipusil niadtong Mayo 17, pasado alas-9:00 sa gabii sa Lakandula st. Jerome Extension, R-Castillo, Davao City.
Sa inisyal nga imbestigasyon sa kapulisan sa pagpanguna ni PMaj Antonio Luy duna na silay gipanubayan nga posibleng suspek, base na sab sa saysay sa pamilya sa biktima.
Nasayran sab nga kanhi nang gi-ambush sa milabay’ng tuig 2022 ang biktima nga nailang si Grardo Katigbak, 36 anyos, nga usa sab karon sa ginalantaw sa kapulisan.
Dugang pa ni PMaj Loy nga walay tarung nga pinuy-anan ang biktima og gabalhin-balhin lamang kini, gani, bag-ohay lamang nanimuyo sa lugar ang nahisgutan.
Kahinumdoman nga gipusil sa naka-motorsiklo ang biktima sulod sa iyang tindahan nga nahimutang sa nasangpit nga lugar.
Saysay sa mga nakakita sa panghitabo nga dunay kauban ang suspek nga nahimong look out nga paspas misibat human ang nahitabong pagpamusil.
Narekober sab sa crime scene ang mga basiyo sab ala sa .45 pistol.
Kasamtangan, mas gipalawman pa sa Bajada PNP ang ilang gihimong imbestigasyon kalabotan sa maong insedente.