Sambilog sa mga tinutuyo it 1st FishTival sa Aklan, nga ginpatigayun sa Aklan Agri-Aqua Demonstration Farm and Training Center hay para mataw-an it alternatibo ro mga farmers.
Sa interview it Brigada News FM Kalibo kay Engr Alexys Apolonio, Provincial Agriculturist it Aklan, naisip ro nasambit nga aktibidad para maipakita nga ro produkto sa Aklan hay owa eamang nakapokus sa paeay ag mga tinuea kundi pati man sa mga isda.
Eabi pa segun kat umagi ro African swine fever o ASF kung siin naapektuhan ro hog industry pati ro mga poultry products, kinhangean eon gid nga makaangkon it alternatibo para sa mga mangunguma kamana man sa mga konsumidor nga indi eon kaya nga bumakae it baboy hay bumakae eon lang it isda.
Ginpahayag man ni Engr. Apolonio nga pwedeng pagkakitaan ro mga ornamental fish.
Sa makarun hay naga-breed segun sanda it sari-saring klase it Tilapya kaparehu it red Tilapya nga mabaskug ro demand, Hito ag iba pang isda nga may commercial value.
Samtang, gin-engganyo man ni Engr. Apolonio ro mga gustong mag training para mag alaga it baboy, manok, isda ag magatanum it mga tinuea, bisitahon eang segun ro Aklan Agri-Aqua Demonstration Farm and Training Center sa Brgy. Nalook. // ANN DESLENE SALAZAR