Pagsunod sa health protocols sa mga pampublikong sasakyan ipinaalala ng HPG kahit bumababa na ang mga naitatalang kaso ng COVID- 19

CAMARINES NORTE- Nagpaalala ang PNP Highway Patrol Group na mahigpit pa ring sundin ang minimum health standards sa mga pampublikong sasakyan kahit mababa na ang mga naitatalang kaso ng COVID- 19.

Hindi raw kasi nangangahulugan na nasa low risk na ang lalawigan ay magiging kampante na ang lahat at ipagwawalang bahala ang pagsunod sa health protocols.

Ayon kay Police Major Joselito Quila, Deputy Regional Chief at Provincial Officer ng HPG sa Camarines Norte mula nang magkaroon ng pandemya ay mahigpit umano ang pagpapaalala nila sa mga pampublikong sasakyan na sundin ang mga itinatadhana ng Inter Agency Task Force (IATF).

Kasama umano sa mga regular violations ang pag iisyu nila ng ticket sa mga lumalabag sa health protocols tulad ng hindi pagsusuot ng face mask at walang social distancing.

Kasama umano nila sa operasyon ang Local Traffic Enforcers upang mag isyu ng Traffic Citations Ticket (TCT) dahil masyado umanong mabigat kung palaging Temporary Operators Permit (TOP) ang tini- ticket.

“Kaya naman namin gusto silang isama para yung ticket nila ang aming gamitin, para po hindi masyadong mabigat at kawawa naman ang ating mga taga rito sa probinsiya natin kung laggng TOP namin ang gagamitin malaki po ang multa at kadalasan pa sa laki minsan di na nakakaya nila kawawa po,” ani Quila.

At ngayong itinaas na sa 70 % ang seating capacity sa public transport, ipinaalala ng opisyal na sundin pa rin ang social distancing.

Kung siya rin umano ang tatanungin ay mas mainam na mayroon pa ding plastic barrier sa mga pampublikong sasakyan dahil nagsisilbi pa rin itong proteksyon.

Pabor naman ang ilang driver ng pampublikong sasakyan na panatilihin pa rin ang plastic barrier dahil hindi lang umano ang pasahero ang napo- protektahan kundi sila na kung sino- sino ang nakakahalubilo.

Leave a Reply

Your email address will not be published. Required fields are marked *