Pagtipon-tipon it limang katawo pasaka, ginakabig nga mass gathering sa Aklan

KALIBO, AKLAN—Ginakabig eon nga mass gathering do pagtipon-tipon it limang katawo o mas sobra pa.

Raya hay sandig sa amended Executive Order nga ginpaguwa ni Aklan Governor Florencio Miraflores.

Nakabaehag sa nasambit nga EO nga hugot nga ginabawae do pagtipon sa guwa it baeay ag mangin do pag-ililimpon sa may kaibahang bukon it miyembro it pamilya.

Pagapasugtan mat-an do mga ginatawag nga “essential gatherings” kung raya hay para magtao it health services, humanitarian activities ag government services nga otorisado it natungdan nga ahensya it gobyerno.

Samtang, pagapasugtan man do mga necrological service, lamay, inurnment ag eobong kung do ginkamatay kara hay ibang sakit ag bukon it COVID-19 apang limitado eamang sa immediate family ag kinahangean sa gihapon nga magsunod sa minimum public health standard.

Sa pihak nga parte, do mga religious gathering hay pagasugtan hatsa eamang sa 30% sa kapasidad sa venue. // SHERRY ANNE REUNIR-VIDAL