Pagtukod sang bag-o nga PAC sa syudad sang Talisay, indi madayon

Magapabilin sa orihinal sini nga lugar ang pagpatukod sang bag-o nga Provincial Administration Center building ukon PAC nahamtang sa natung-an nga dalan sang Gatuslao-Aguinaldo kag North Capitol Road ukon sa atubang sang talatapan sang National Bureau of Investigation sa syudad sang Bacolod.

Ginpahayag ni Governor Eugenio Jose Lacson ang contractor sang proyekto nga Dynamic Builders and Construction Company, Incorporated nagpariser nga indi ini handa ukon magpasugot para sa liwat nga pagpatigayon sang bidding ukon rebidding.

Bangud sini, ang Dynamic Builders ginhatagan na sang permiso sa pagpadayon sang ila nga trabaho sa orihinal nga lugar kun sa diin nagatindog sa karon ang daan nga Provincial Administration Center.

Ginklaro ni Governor Lacson indi na madayon ang plano nga pagsaylo sang PAC sa 25 ka hektaryas nga propyedad nga ginapanag-iyahan sang probinsya sa syudad sang Talisay sandig sa una sini nga plano kun sa diin ila pagatun-an kun ano ang himu-on sa nasambit nga propyedad.

Isa sa mga ginalantaw ni Lacson nga himuon sa amo nga propyedad ang pagpatigayon sang pila ka mga “economic activity”.

Sa madumduman ginplanuhan sadto sang gobyerno probinsyal ang pagpatigayon sang rebidding sa pagpatukod sang PAC sa syudad sang Talisay nagabalor sang 1 ka bilyon ka pesos.

Sa nahibaluan nabaton na sang contractor ang 15 porsyento nga advanced payment para sa amo nga proyekto halin sa probinsya para sa ila sini nga ‘mobilization fund’.

Ang konstruksyon pagasuguran sa labing madali nga panahon. Via/ Nimrod Zabala

Leave a Reply

Your email address will not be published. Required fields are marked *