Pamilya gibaylog sa online sabong sa amahan

Mupauli na lamang sa Bislig City, Surigao del Sur ang usa ka Bernalyn Numeral kuyog ang iyang duha ka gagmay’ng bata human sila gipasagdan sa iyang bana nga naadik sa online sabong.

Saysay ni  Bernalyn sa  91.5 Brigada News FM-Davao nga halos wala na silay kaunon sanglit ihurot na man sa iyang bana nga si Jerry ang tanan niining sweldo isip construction worker sa pusta sa talpakan.

Duna matud pay higayon nga midawat kini og labada aron makaabaga sa mga gasto apan mas nisamot ang bisyo sa iyang bana.

Tungod sa pagka-iresponsable sa iyang kapikas nakadesisyon kini nga idangop sa Brigada aron magpakitabang nga makauli sa ilang probinsya nga wala usab pakyasa sa mga tigpaminaw.

Sa karon mokabat na sa kapin P6,000 ang nalikom gikan sa mga nalouy sa mag-inahan nga nagpuyo sa Boulevard ug gisiguro sa sibyanaan nga mahatud ang mag-inahan aron dili na makasinati og kalisud dinhi sa syudad. BNFM-Davao