Pangulo sa pula nga cluster sa tricycle nagpasalamat sa SP sa gi- aprubahang usbaw pletihan nga 18 pesos

NAGPASALAMAT ang pangulo sa pula nga cluster sa tricycle kay gi- aprubahan sa konseho sa ulahing session sa 19th council ang ilang giduso nga usbaw pletihan sa tricycle.

Sa paghinabi sa 89.5 Brigada News FM Gensan kay Josue Fernandez sumala niini nga nalipay sila sa pag-apruba sa konseho sa ilang hangyo nga usbawan na ang pletihan gumikan makapila nakahigayon nga nisaka ang presyo sa lana samtang ang pamasahe nagpabilin sa P10.

Gikumperma ni Fernandez nga una nila nga giduso sa Motorized Tricycle Franchising and Regularoty Board kon MTFRB ang usbaw gumikan naduso ang P10 nga minimum fare sa dihang tag P40 pa ang litro sa gasolina.

Ang resulta sa ilang meeting gi-aprubahan usab sa board ang P18 nga sugyot kay ang gasolina naabot na sa P80 matag litro.

Tungod niini ang hangyo ni Fernandez sa mga sumasakay nga sabton usaba ng sitwasyon sa mga driver nga pigado usab sa pamasada, kay aduna pa daw ubang pasahero nga P10 ang ginahatag bisan layo ang destinasyon.

Paabuton usab nila ang fare matrix aron maoy basihan unya sa P18 nga upat ka kilometros unya P2 sa mosunod nga kilometro. I Ver Diazon