LEGAZPI CITY – Nakapagrehistro nin panibagong kaso nin African Swine Fever (ASF) sa syudad nin Ligao hale sa sarong slaughter house sa Brgy. Sta. Cruz.
Sa intrivista kan Brigada News FM Legazpi kay Albay Veterinary Office Head Dr. Pancho Mella, sinabi niya na nahiling kan meat inspector na may sintomas an orig kan nakalihis na semana sa tahaw kan inspection kaya tulos man nagpadara nin sample sa laboratory nganing ma-assess asin duman na nakumpirmar na positibo man nanggad ini sa ASF.
Mientrastanto, limang aldaw makalihis an insidente tulos man na pinasara an pasilidad asin nagkaigwa nin cleaning and disinfection mantang pakatapos binuksan man giraray asin ngunyan nagkokondusir na sana nin surveillance activity.
Sa presente, nganing masiyertong dai magkaigwa nin outbreak, kinuwaan ki sample an nagkapirang orig sa bilog na syudad puon sa 1KM radius asin pig-submit sa laboratory dugang pa an pag-control kan movement sa sakop kan 500km radius kun sain ugwang ibinugtak na ki checkpoint, nganing dae nin makaluwas sa bisinidad kan lugar asin dae na makaulakit sa kataraid na barangay.