Panukalang batas na layong buwagin ang PITC at PS-DBM, inihain na sa Senado

Naghain si Senator Imee Marcos ng mga panukalang batas na nagpapabuwag sa Procurement Service ng Department of Budget and Management (PS-DBM) at Philippine International Trading Corp (PITC).

Sa kanyang Senate Bill No.2388, ipinabubuwag ang PS-DBM na nilikha sa panahon ng kanyang ama na si dating Pangulong Ferdinand Marcos noong 1978, dahil hindi na raw ito kailangan at pinamumugaran lang ng katiwalian.

Ayon sa mambabatas, tila naging fertile-breeding ground ang PS-DBM para sa katiwalian at lumagpas sa mandato batay sa natukoy na paglilipat dito ng Department of Health (DOH) ng P42 billion para magpabili ng medical supplies at hinihinala ngayong bumili ito ng overpriced sa isang kompanya na naku-kwestiyon ang kredibilidad at koneksyon.

Sa bukod nitong Senate Bill No.2389, ipinabubuwag naman ang PITC na itinatag din noong Marcos Administration noong 1973 para mangasiwa sa pakikipagkalakalan sa mga socialist at mga mayayamang bansa.

Pero ayon sa Senador, naging lipatan ito ng pondo ng iba’t-ibang ahensya para magpabili ng kagamitan o kaya naman ay magpark ng pondo na iniiwasang mapabalik sa National Treasury.

Ang PS-DBM at PITC ay bumili ng mga facemask at mga PPE na hinihinalang overpriced. //MHEL PACIA-TRINIDAD via CLAY MARQUEZ

Leave a Reply

Your email address will not be published. Required fields are marked *