-Reymund Titong
KABANKALAN CITY, Negros Occidental — Isa ka grupo sang mga ginikanan nga chess players ang mga kabataan ang nagtukod sang isa ka asosasyon sa syudad sang Kabankalan, nga may adbokasiya nga pabaskugon ang hampang nga chess.
Sa interview sang Brigada News FM-Kabankalan kay Mr. Jack Asuncion, presidente sang Kabankalan City Parents Chess Association (KCPCA), iya ginpahayag ang importansya sang hampang nga chess sa brain development sang Kabataan, lakip na ang pagtudlo sang disiplina.
Dugang pa ni Asuncion nga nagsugod ang plano sa pagtukod sang KCPCA sa isa ka sugilanon kaupod ang iban pa nga mga ginikanan, nga kun pwede sila ka himo sang isa ka asosasyon sang ginikanan nga naga-suporta sa ila mga kabataan nga naga hamtang sang chess.
Sang Marso 2024 lang sang natigayon ang pagtukod sang ila asosasyon, nga may adbokasiya nga pabaskugon ang hampang nga chess sa syudad sang Kabankalan kag 6th district.
Sa una nga apat ka bulan sang asosasyon, naka-patigayon na sila sang labing una nga chess tournament para sa mga Kabataan nga below 18 years old, sang Hulyo 1, sa City Mall-Kabankalan, nga may yara sang kabug-usan nga walo ka teams nga may lima ka indibidwal kada team, gikan sa nagkalain-lain nga lugar sa 6th district.*