PBA teams, pwedeng mag-set up ng sariling training bubbles sa MGCQ areas

Hindi muna pwedeng magsanay ang mga PBA teams sa kani-kanilang mga sariling gyms habang nasa ilalim pa rin ng modified enhanced community quarantine ang Metro Manila.

Gayunman, sinabi ng PBA na pwede naman bumuo ng sariling training camps ang mga kuponan sa mga bubble environments, sa kondisyon na gagawin nila ito sa mga lugar na nasa ilalim ng modified general community quarantine.

Iginiit ni PBA commissioner Willie Marcial na dapat ay kumuha rin ng permiso ang mga kuponan mula sa local government units ng lugar na pagdarausan ng kanilang training.

Dagdag ni Marcial, hihingian rin nila ng sulat mula sa IATF ang mga pangkat na nagsasabi na pinapayagan silang mag-training sa MGCQ areas.

Bukod diyan ay kailangan rin ng mga pangkat na humingi ng permiso mula sa Games and Amusements Board, na mag-iinspeksyon sa training facility ng kanilang pupuntahan.

Dapat rin anya ay sabihan ng mga ito ang PBA kaugnay sa mga protocols na ipatutupad nila sa bubble.

Matatandaan na napayagan ang PBA teams na magsagawa ng maliit na group training sessions noong January ngunit natigil ang lahat ng ito sa Marso nang isailalim muli ng gobyerno ang Metro Manila at ang mga karatig na probinsya sa mas istriktong quarantine protocols dahil sa pagsipa ng COVID-19 cases.