LEGAZPI CITY – Padagos an pagpuho asin pagpapakusog kan Philippine Drug Enforcement Agency (PDEA) Albay sa saindang kampanya kontra iligal na droga sa probinsiya.
Sa intrevista kan Brigada News FM sa namamayo kan PDEA Albay na si Noe Sallan Briguel, pigsabi niya na nakikipagkooperar sinda sa mga Barangay Drug Abuse Council na iyo an nagmomonitor kan mga tawo o mga personaheng imbuwelto sa iligal na droga.
Tulos man na minarespondir an nasambitan na opisina nganing madakop an mga tawong imbuwelto digdi.
Pigsabi ni Briguel, an gabos na operasyon ninda, nag-aagi sa mahigot na proseso asin pigpaplanuhan na maray siring kan pagsagibo nin meeting o briefing para sa mga tawong kaibahan sa gigibuhong operasyon ta nganing magin matrayumpo ini.
Dugang pa kaini, labing sampulo katawo na an saindang nadakop sa laog kan Enero hasta Marso kan presenteng taon, asin kadaklan kaini, nadakop sa laog kan harong o iyo an pig-aapod na Drug House Operation.
Apwera digdi, poko mas umenos 1,000g kan iligal na droga na nagkakantidad PHP 9M an pinakadakulang narekober kan opisina kan nakalihis na taon; alagad, mas diit su boot an nagpositibo kan administrasyon ni Presidente Rodrigo Roa Duterte.
Segun kay Briguel, nagapuon pa man sana an saindang operasyon ngunyan na taon, kun kaya dai niya pa masabi kun gurano kadakula an diperensya kaini.
Mientrastanto, may mga pigsasagibo asin pigbubusol man an naunambitan na opisina ki manlain-lain na mga programa nganing mainaan an kaso nin nagagaramit ki iligal na droga. | MAEDIN DEXISNE