PERSONAL nga bangi ang gisundang motibo sa kapulisan sa pagpusil angol kang Ryan Armada, 29-anyos, welder nga taga Deca homes, Barangay Calumpang.
Nahitabo ang insidente sa nahisgotang lugar alas 11 gabie, Abril 14. Basi sa impormasyon sa Tambler police station ang suspek sa pagpamusil naila kang Alijandro Adloam alyas Allan, 52-anyos, residente sa nahisgotang lugar.
Samtang nag-inom matud pa ang biktma kuyog ang laing silingan kalit midool kaniya ang suspek nga may kasuko ug dayon mibunlot og armas ug gipusil sa makadaghan nga higayon ang biktima igo sa nagkadaiyang parti sa lawas.
Human sa insidente gilayon misibat ang suspek ug nabilin ang iyang motorsiklo dihang miambak kini sa pader sa naasoy nga subdivision. Sa impormasyon sa kapuyo sa biktima nga si alyas Angelie bag-o lang sila misuroy sa lugar kung asa nagapanday og balay ang iyang mister.
Unya namatikdan niini nga kanunay matud pa masuko ang suspek kung magsaba ang ilang mga anak. Hangtod nga misangko sa pagpamusil. Narekober sa crime scene ang usa ka unit sa caliber 45 nga armas, 1 steel magazine kargado og 2 bala ug upat ka basiyo sa susamang armas. Lakip na ang motorsiklo sa suspek.
Sa kasamtangan stable ang kahimtang sa biktima nga padayong nagpaalim sa ospital ug nagpadayon ang follow-up investigation sa kapulisan aron masikop ang giilang suspek. I Enamie Mogpon