LEGAZPI CITY – Nagpaabot nin tabang an Gobyerno Probinsyal kan Albay (PGA) sa sarong pamilyang nasuloan sa isla kan Rapu-Rapu, Albay. An nasambit na tabang, naipanao sa pagbisita kan Gobyernong Gumagalaw at Lumalapit sa Tao (GGL) Caravan na nagbenepisyo sa onseng (11) barangay sa nasambit na banwaan.
Kun magigirumduman, kan nakalihis na Hunyo 15, ngonian na taon, nasulo an harong kan Pamilya Bilo kun sain natupos halos gabos na gamit asin halos dai na digdi nin natada.
Dahil digdi, nagpaabot nin tabang an gobyerno probinsyal kun sain kaiba sa mga naipanao sa nasambit na nasuloan iyo an assistance package, mga yero, toilet bowl, groceries, bagas, asin cash.
Nagpasalamat man sa PGA si Michelle Dela Tore Bilo, 39-anyos asin tagsadiri kan harong na nasulo sa tabang na naitao sainda. Sa tabang man kan nasambit na caravan, nakapagpamedical check-up asin nakapag-avail man an pamilya ni Bilo kan manlaen-laen na serbisyo hatod kan PGA.