-Andy T. Galve
NEGROS OCCIDENTAL, Philippines — Pilason ang isa sa mga katapo sang Kabankalan City Police Station matapos nga ini gina-alegar naluthangan sang isa sa mga suspetsado sa ila ginpatigayon nga drug buy bust operation sa Purok Magkinigkig, Barangay Tan-awan, syudad sang Kabankalan, sang Hulyo 2, 2024.
Ginkilala ang biktima kay Police Staff Sergeant Iric Montoyo nga nakaangkon sang pilas sa iya tuo nga bahin sang abaga, kag gilayun naman nga gindala sa pinakamalapit nga ospital para mahatagan sang nagakaigo nga pagbulong.
Target sang operasyon amo sanday Alvie “Toto” Taco, Top 1 Drug Priority List sa syudad kag Joseph Sapu-an, ginakabig naman nga isa ka street level individual (SLI).
Na rekober sang kapulisan sa paghinakop sang mga suspetsado ang 20 gramos nga gina-suspetsuhan shabu, armas luthang kag isa ka TMX nga motorsiklo.
Yara na sa karun sa kustodiya sang kapulisan ang duwa ka suspetsado kag magapangatubang sang kaso bangud sa ilegal nga paghupot sang ilegal nga droga, armas luthang, lakip na ang kaso nga frustrated homicide.*