GIUNDANG na sa pipila ka ‘bar’ sa General Santos City ang ilang operasyon dungan sa pagpatuman sa ‘liquor ban’.
Matud ni Barangay Apopong Kapitan Paulo Natividad, co-owner sa Ultimate Superclub, nagdesisyon sila nga isarado usa ang bar aron malikayan ang pagkalugi tungod wala nay mga kostumer nga magtagay sa bar tungod sa nasangpit nga restrictions.
Apan abli sumala pa ang café ug andam mo-serve og dinner ang nasangpit nga establisimento. Giangkon ni Natividad nga apektado ang ilang mga empleyado apan angayang mosunod sa gipatumang restriction kontra Covid-19.
Gawas niini,pipila ka bar ang nagpaabot og impormasyon nga sila ang temporary usa nga moundang sa ilang operasyon. Samtang, sarado na usab ang mga namaligya og ilimnong makahubog sulod sa KCC ug SM mall. Lunes sa buntag, dihang gipagula sa LGU ang executive order no.22 nga asa napatik ang pagpatuman sa ‘liquor ban’ 24 oras sa GenSan. (Richel Gubalani)