NIBATI og dakung kabalaka ang mga lumulupyo sa Purok 12-A, 3rd IB gumikan daw sa magkasunod nga pagpanulod sa mga tulisan sa panimalay mao nga may nagplano nga saradhan ang ilang kalye ug gisugyot ang subli nga pagpatuman sa curfew hours.
Sa pagbesita sa taga Brigada Gensan sa 3RD IB Kagitingan Village aron magsusi sa nahitabo kay Virginia ILmeng ang balo nga gitulis patay, nigawas sa panimalay ang pipila ka lumulupyo sa lugar ug nagpaabot sa ilang tuman nga kabalaka sa ilang kaugalingon.
Sumala sa usa ka magtutudlo nga nagpaila lang sa tawag nga Teacher Ayeng, gumikan daw sa sunod-sunod nga panghitabo sa ilang lugar grabe daw ang iyang kulba,ang resulta kaniya gamay lang nga kuskos sa gabei makamata na siya mao nga kulang siya sa tulog.
Pabor usab kini nga ipatuman ang curfew hours sa ilang purok aron mabantayan ang naga gawas sa gabei, samtang busy usab ang ilang mga bana sa plano nga magbutang ug kural sa ilang kalye.
Gidugang ni Tracher Ayeng nga sa milabay nga semana lang daw may boarder sa ilang duol nga gigapos og masking tape gikuha ang ilang kwarta ug alahas alas 5 sa buntag samtang ang bana sa biktima niadto sa palengke.
Gikumperma usab sa anak sa tag iya sa boarding house nga gitulis ang ilang boarder, sumala kay Wendy Laurente ug sa iyang igsuon nga si April Joy Albon sa karon bakante na ang ilang ginapaarkilahan nga balay kay nipahawa na ang gitulis nga boarder, na trauma daw kay gibaharan nga balikan.
Sumala kay Marie Mae Julao, asawa sa GKK President sa 3rd IB nga si Egdar Julao, naga trabaho usab sa Barangay Hall sa Fatima, dili nila masabtan ang ilang gibati niining higayuna human nga adunay gitulis patay sa ilang lugar, aduna usab boarder nga gibaatan og masking tape ang baba ug lawas unya gikuha ang kwarta ug alahas.
Gidugang ni Julao nga dili pa usab mawala sa iyang panumdoman ang ilang kauban sa Barangay nga si Roy Planas taga Fatima nga giluba patay usab sa mga kawatan mao nga nanawagan kini sa iyang mga silingan nga mag alerto gayod sa matag usa kay dili man kabantay ang pulis sa tanang panimalay.
Sa bahin sa ilang Purok Chairperson nga si Ellen Bautista gisulti niini nga wala sila nagapabaya kay ang iyang mga sakop nga kanhi BCCF nagpadayon sa pag roving, pasamalat usab kini sa nagahatag og kape ug tinapay.
Napulo ka tuig daw siya nga nahimong secretary malinawon man ang ilang purok apan karon nasudlan sila ug tulisan. I Ver Diazon