Gi-uyonan sa pipila ka mga barangay kapitanes nga angayan arestuhon ang mga opisyales nga wala mibuhat sa ilang tagsa-tagsa ka mga responsibilidad human nga gimandoan ni pangulong Rodrigo Duterte ang mga kapulisan tungod sa nagka taas nga ihap nga kaso sa Covid-19 sa nasud sa Pilipinas.
Sumala pa ni Kapitan Cornelio Estigoy Jr. ang punong barangay sa barangay Patrocinio sakop sa lungsod sa Sta. Josefa, kinahanglan gayud nga magbinantayon ang mga barangay opisyales ilabina na sa pag sita sa mga katawhan nga wala mituman sa mga protocols sama sa pag sul-ob ug facemasks, pag tapok-tapok nga wala nagpatuman ug usa ka metro nga distansya aron nga malikayan ang local transmission ilabina na nga pipila na ka mga lugar ang dunay daghan nga ihap sa kaso sa delikadong kagaw.
Sa pikas nga bahin, mihangyo ang maong opisyal sa tanang mga katawhan nga iyang gisakopan nga mamahimong makig kooperar sa gobyerno pinaagi sa pagtuman sa mga balaud aron nga mas dili na mo grabe pa ang kahimtang sa ilang lungsod partikular na sa barangay Patrocinio.
