MINGAW og murag dili pyesta ang nahitabo sa Barangay Bula kaniadtong adlaw nga Sabado atol sa kapyestahan sa ilang patron nga Sto. Niño.
Sa pahayag sa labaw sa komitiba sa maayong panglawas nga si Kagawad Antonio Talle sumala niini nga labihan kamingaw ang Bula murag walay okasyon gumikan sa gipatuman nga hugot nga pagbantay sa mga entrances sa Bula aron nga walay makasulod nga mga tawo gikan sa laing dapit.
Tungod niini nagapasalamat si Talle sa kapulisan, sa kasundalohan, sa mga sakop sa Cympel ug Police Hotline nga ni-ayuda sa mga checkpoint.
Nagapasalamat usab si Talle sa mga katawhan nga dili taga Bula nga wala nanamugos sa pagsulod sa Barangay Bula aron mamyesta kay gilikayan ang panagtapok.
Nagapasalamat usab si Talle sa taga Parokya sa Bula nga gisunod gayod ang social distancing unya by district ang mga pagsimba aron dili mausa ang bagang buto sa mga parokyano nga nisimba.
Sa katibuk-an hapsay matud pa ang kapyestahan sa Bula ug natuman ang kamandoan sa barangay nga sa sulod sa 24 oras ibawal ang pagsulod sa taga laing barangay.
Kahibaluan nga matag tuig nga ginapangandaman sa taga Bula ang ilang kapyestahan ug maoy labing sadya nga pyesta sa Gensan. I Ver Diazon