PNP, AFP tiniyak ang seguridad kasabay ng babala ng Japan sa posibleng terror attack

Tiniyak ng mga law enforcement agency ng bansa na nakatutok sila sa pagbabantay sa seguridad ng bansa kasabay ng babala ng Japan embassy na mayroong banta ng terrorist attack sa ilang bansa sa Southeast Asia.

Ang pagtiyak ay kasunod ng warning ng Japan sa kanilang mga mamamayan na iwasan muna ang Pilipinas at iba pang bansa sa rehiyon dahil sa bantang suicide bombing ng mga terorista.

Sinabi ni PNP Chief General Guillermo Eleazar na bagamat hindi naman nawawala ang banta ng terorismo ay wala naman silang namomonitor na pag-atake.

Ayon kay Eleazar, patuloy ang mahigpit na ugnayan ng Pilipinas sa iba’t ibang bansa para sa information sharing kaugnay sa monitoring sa mga terrorist group.

Siniguro naman ni AFP Spokesman Col. Ramon Zagala na mahigpit ang ginagawang validation ng kanilang intelligence group sa mga nakukuhang impormasyon para sa seguridad ng bansa.