Pnp Caraga giimbestigahan ang insidente sa pagpamusil sa San Francisco, Agusan del Sur

Gibutyag mismo ni Police Brigadier General Romeo M. Caramat, JR, Police Regional Office 13 Director, nga nagpahigayon ang Agusan del Sur police makuting imbestigasyon sa nahitabong pagpamusil sa Purok-1A, Brgy. 1, San Francisco, Agusan del Sur mga alas 11:00 sa buntag kagahapon.

Giila ang biktima nga si Merofe B. Gallego, 43-anyos, residente sa Purok-2, Brgy. Bayugan 3, Rosario, probinsya sa Agusan del Sur.

Base sa report sa San Francisco Municipal Police Station, samtang sakay ang biktima sa usa ka depasaherong traysikol, gipusil sa duha ka mga suspek nga nagmotorsiklo ang biktima sa makadaghang higayon nga naigo sa nagkadaiyang parte sa lawas nga maoy hinungdan sa iyang kamatayon.

Giproseso sa mga sakop sa Agusan del Sur Provincial Forensic Unit ang crime scene ug nakuhaan kini og unom ka fired cartridges, usa ka fired bullet, ug usa ka jacket nga bala sa mubo nga armas nga wala pa matino nga kalibre sa armas kung diin aha nahitabo ang maong insidente.

Base sa pamahayag sa bana sa biktima, walay kaaway o nalambigit sa bisan unsang kasamok ang iyang asawa.

Gipadayag pa sa kapolisan, gitan-aw na karon ang tanang anggulo aron mahibal-an ang motibo sa krimen kung diin nagpahigayon na ug mga interview sa posibleng mga saksi ug nangita na usab og dugang nga video footage gikan sa mga CCTV duol sa lugar aron matumbok gilayon ang duh aka suspek sa pagpatay sa biktima.
-END-

Leave a Reply

Your email address will not be published.