Police Captain, patay sa nagluntad nga aksidente sa Brgy. Lawaan, Roxas City

Patay ang isa ka pulis nga miyembro sang Capiz Police Provincial Office matapos maaksidente sa iya ginamaneho nga salakyan kaina sang kaagahon sa Barangay Lawaan, Roxas City.

Ginkilala ang biktima kay Police Captain Roy Lusterio, 49 anyos, residente sang Barangay Mabini, Binuangan, Misamis Oriental apang na-assign diri sa probinsiya sang Capiz.

Base sa inisyal nga imbestigasyon sang Roxas City Police Station, sakay ang biktima sa iya salakyan nga Montero Sport samtang nagasubay sa nasambit nga lugar.

Naglapaw ini sa karsada, bumunggo sa poste kag ginsalakay ang isa ka balay.

Sa interview sang Brigada News Team kay Roldan Dela Cruz, tag-iya sang balay, ginpahayag sini nga nagakatulog siya sang natabo ang aksidente kag nakibot nalang ini sang nagsinggit ang iya asawa.

Dugang pa sini, nagpangayo siya sang tabang kay indi siya makatindog bangud natambakan ini sang atop sang iya balay sa diin nag-angkon ini sang mga bagras sa likod.

Sa karon, padayon pa ang imbestigasyon sang mga kapulisan sa nasambit nga aksidente. | Judy Ann Juare

Leave a Reply

Your email address will not be published. Required fields are marked *