BICOL— Huli sa obheto na mabawasan dawa papano ang kamunduan kan mga PDL asin kan saindang mga paryentes huli ta padagos pang ipinagbabawal ang face to face na pagdalaw sa mga karsel, tiglunsar kan Bureau of Jail Management and Penology sa banwaan nin San Andres, Catanduanes ang “Pantighaw Lungkot E-Dalaw sa PDL” .
Sa intrebista ki Jail Warden SJO Jorge Gregorio, sinabi kaini nap u-pwede nang makaulay kan mga PDL an saindang mga padangat sa buhay sa paagi nin messenger kung sain tutugutan sindang makagamit nin telepono o cellphone sa oras asin pagkakataon na saindang itutugot.
Alagad, maigot man giraray nindang ipagbabawal an pag posses o pagbitbit nin cellphone kan mga preso sa laug kan saindang karsel.
Bago man sinda tugutan na maka avail kan E-Dalaw kaipuhan kan mga ining makipag koordinar sa namamayo kan BJMP para matawan nin schedule an pagkundusir nin E-Dalaw.
Marurumdan na hasta kaya sa ngunyan, istriktong pigpapautob bako lang sa karsel sa banwaan nin San Andres kundi pati naman sa iba pang presinto an mga health protocols arog na lang kan pag require nin negatibong resulta nin swab test asin pagsairarom sa 21 days quarantine maging kan mga may kasong indibidwal na ilalaug sa selda.
Katakod kaini, idinugang kan opisyal na nakatalaan man sindang mag kundusir ning Tech4Ed-IT Skills sa mga PDL sa mga masunod na semana sa tabang asin kooperasyon naman kan DICT-Catanduanes.