Proposed Housing Project para pigado sa Benitez Administration, may magasuporta nga NGO

Naga umpisa na sa pagpangita ang Benitez Administration sang Budget kag tagasuporta gikan sa National Government, Non-Government Organization (NGO) Partners, subong man ang pagpatigayon sang Assessment sa mga Real Estate Assets nga gina panagiyahan sang Bacolod ini ang gin pahayag ni Bacolod City Councilor-elect Vladimir Gonzales sa interview sang Tira Brigada.

Suno kay Gonzales, pa diri, naga coordinate ini siya sa mga foreclosed nga mga lote sa mga banko nga mahimo nga pagabaklon kag tukuran sang tuyo nga housing projects para sa pigado nga mga taga syudad. Dugang pa ni Gonzales, tuyo ni Mayor-Elect Albee Benitez magtukod sang low rise building agud paga istaran sang mga pamilya nga mga eskwater sa palibot sang Bacolod kag indi na maghulat pa sang ejectment ukon demolition order gikan sa korte. Apang gin klaro sini, nga wala gina dula sang Grupo Aseno ang pagtukod sang relocation sites kaangay sang Handumanan kag Progreso Village kon maskilala bilang Arao ukon Abada Eskay sa Barangay Vista Alegre.

Paathag ni Gonzales,ining duha ka mga magkatuhay nga housing project nga tuyo ni Mayor Albee ang matawag nga Onsite kag Offsite Development. Ang Onsite Development ang pagtukod sang low rise building malapat sa sentro sang Bacolod apang ang maga akopar sini ang may bulanan nga balayran suno sa kasarangan samtang ang relocation site amo ini ang Offsite Development nga ang mga gina demolished gikan sa sentro sa Bacolod ang pagadalon sa malayo nga lugar bilang gintalana nga relocation sang Bacolod.

Pahayag sang incoming Bacolod City Councilor Vladi Gonzales, maga hatag ini sila sang madamo nga options para sa Bacolodnon suno sa ila financial capacity to pay kag ila iga pasulabi ang mga nagapuyo gikan sa mga danger zone sa palibot sang Bacolod kag ini ang isa ka tikang nga maka hatag sang preparasyon sa mga eskwaters nga indi na maghulat pa sa mando sang korte antis magkinaran-karan.

Sa karunn may mga NGO, Negusyante kag Ahensya sang Gobyerno ang luyag mag suporta kag magpundo para sini nga proyekto bilang isa sang priority project sang Grupo Asenso sa pagpanguna ni incoming Mayor Albee Benitez pagabot sang Hunyo 30 sang udto.

Leave a Reply

Your email address will not be published. Required fields are marked *