Sumailalim kahapon, unang araw ng Hulyo ang Pamahalaang Panlalawigan ng Isabela sa Regional Assessment para sa 2024 Seal of Good Local Governance (SGLG) na isinagawa sa GFNDy Sr. Session Hall, Isabela Provincial Capitol.
Ayon sa Regional Assessment Team (RAT), hawak ng Isabela ng pitong taon ang Seal of Good Local Governance at umaasang muling makukuha ngayong taon.
Ayon naman kay Department of Interior and Local Government (DILG) Regional Director Agnes A. De Leon, nakitaan nang puspusang pagseserbisyo ang mga opisyal ng lalawigan at pangunahing tinutugunan ang pangangailangan ng mga mamamayan.
Sumailalim ang Isabela sa 10 governance areas na kinabibilangan ng Financial Administration; Disaster Preparedness; Social Protection and Sensitivity; Health Compliance and Responsiveness; Sustainable Education; Business Friendliness and Competitiveness; Safety, Peace and Order; Environmental Management; Tourism, Heritage, Development, Culture, and the Arts; at Youth Development.
Ang Seal of Good Local Governance (SGLG) award ang pinakamataas na parangal na iginagawad ng DILG sa mga Probinsya, Lungsod at Munisipalidad na siyang nagpakita ng kahusayan at katapatan sa iba’t-ibang aspeto ng pagseserbisyo-publiko.