Nagpatigayon sang sinapol ang Provincial Health Board via Zoom platform kahapon nga adlaw sang Biyernes, may kaangtanan sa pagtaas sang mga balatian sa probinsya sang Capiz.
Ginpangunahan ini ni Gov. Fredenil Castro bilang Chairman sa diin ginpresentar sang Provincial Health Office sa bug-os nga konseho ang numero sang kaso sang nagkalain-lain nga sakit.
Ginkasubo naman sang gobernador ang pagtaas sang kaso sang Covid-19, Hand- Foot- and- Mouth Disease, Dengue, Leptospirosis kag iban pa.
Suno kay Gov. Castro, magahulat siya sang rekomendasyon sang konseho para sa nagakadapat nga mangin tikang sang gobyerno probinsyal agud nga matapna kag malikawan ang ini nga mga balatian.
Gin-aprubahan man sang Provincial Health Board ang Memorandum of Agreement sa tunga sang Department of Health- Western Visayas Center for Health Development kag Capiz Provincial Government, nahanungod sa paghatag sang P300,000 nga financial assistance sa PHO agud usaron sa pagpapag-on sang mga programa sa ikaayong lawas sa probinsya.
Ginpasalamatan man sang gobernador ang mga katapo sang konseho sa ila ginahimo agud mapakigbatuan ang mga balatian nga nagatuhaw. | Judy Ann Juare