LEGAZPI CITY – Mahigot na pigkokondenar kan Albay Provincial Veterinary Office an pagsasagibo nin “pagpapatandok” bilang alternatibong paagi sa pagtratar nin rabies na kawsa kan kagat nin ayam o ikos.
Katakod ini sa mga nairehistrong kaso nin pagkagadan sa probinsya huli sa rabies na sa ngunyan nasa apat na.
Segun kay Provincial Rabies Coordinator Dr. Manny Victorino kan nasambitan na opisina, nakakaalarma na an nagsasakat na numero kan mga kaso na nagigin kawsa nin tulos na pagkalat kaini.
Sinabi niya, bako ini maray na practice huli ta dakol ining negatibong epekto na mas mapalala sana sa impeksyon.
Segun pa saiya, dai man nabubulong kan anti-biotic asin pagpapatandok an rabies, kundi an solamenteng paglaom digdi, iyo an pagbabakuna kontra digdi.
Kaya huli kaini, mas pigpapakusog na ninda katuwang an Provincial Health Office an pagkondusir nin bakunahan sa probinsya.