Subli nga nagpahimangno ang Philippine Statistics Authority (PSA) Davao del Norte nga mukabat sa P500,000 ang multa sa si kinsang mang mubalibad sa pagdawat sa Philsys isip valid ID.
Kini human nga daghang reklamo nga nadawat ang PSA kalabotan niini.
Sumala pa ni PSA Chief Statistician Pepito Amoyen nga base sa Section 19 sa Philsys Act or the Republic Act 11055 makamulta og tunga sa milyon ang bisan unsang pribado o government nga mga establisyemento ang dili muila sa Philsys isip valid ID.
Dugang pa ni Amoyen nga mamahimong magpadala og sulat ang si kinsa mang nakasinati sa maong reklamo, gani ubay-ubay na sab nga mga ahensiya ug establisyemento ang iyang gipangayuan og eksplinasyon sa wala pagdawat sa National ID.
Gipamugos sa opisyal nga migasto og mahal ang gobyerno sa maong ID og balibaran lamang sa pipila ka mga ahensiya hinungdan nga gituyo sa balaud ang moang kantidad sa multa.
Gipasabot sab ni Amoyen nganong walay pirma ang National ID gumikan igo na ang personal biometrics ug iris scan aron nga ma-identify ang usa katao ug mas reliable kini itandi sa pirma nga mamahimo pang ma-kopya sa uban.