Positibo ang nangin resulta sang ginhiwat nga public hearing angut sa gina-proposed nga new building sang Capiz Provincial Government sa Brgy. Dinginan, Roxas City.
Suno kay Wilar C. Delos Santos, Provincial Planning and Development Coordinator, iya ginpahayag nga ang gina-propose nga bag-o nga kapitolyo ang mas malapad kag maka-akomodar sang madamo nga cliente ikumpara sa subong nga edipisyo.
Dugang pa sini, ang lugar nga pagatukuran sang new building ang may kalaparon nga 30,000 square meter, kun sa diin may yara sang malapad nga parking area para sa mga empleyado, cliente kag mga bisita.
Malapit man ini sa Pueblo Terminal kun ikumpara sa daan nga kapitolyo bangud ang masami nga nagapadulong sa amo nga talatapan ang mga pumuluyo nagikan sa 1st district kag 2nd district.
Kun maaprubahan na sa final reading ang nasambit nga proposal kag madayon na ang pagtukod sang bag-o nga edepisyo, ang daan nga kapitolyo ang pagahimuon nga cultural museum, ceremonial heritage structure, enterprise hub kag madamo sang iban pa. | Judy Ann Juare