Pulis nangulata og babaye sa bidyo, gisipa sa pwesto

GITAKTAK na sa pwesto ang usa ka bagitong pulis human nabidyohan nga gimaltrato ang kapuyo sa Kidapawan City.

Kini gawas sa patong-patong nga kasong kriminal ug administratibo nga gipasaka batok kang Police Corporal Louie Jay Lumancas, 30-anyos, minyo, PNP member nga naka-destino sa Magpet Municipal Police Station ug taga barangay Gubatan, Magpet, Cotabato.

Gilayong gitaktak sa pwesto ni Police Brig. Gen. Jimili Macaraeg, director sa Police Regional Office (PRO-12) human nakita ang nag-viral nga bidyo ni lumancas samtang giayo og kulata ang kapuyo. Kasong pagsupak sa Republic Act 9262 o Violence Against Women and Their Children (VAWC) ang ipasaka sa sakop sa Kidapawan City pulis batok kang Lumancas.

Ang insidente sa pag-maltrato ni Lumancas sa kapuyo ug ang aksyon nga gihimo sa pangulohan sa PRO-12 ang ‘warning’ sa tanang sakop nga molambigit sa pagpangabuso.

Dugang ni Macaraeg, ang kapulisan ang taga protekta sa katawhan ug dili nga mao pa’y mangabuso. Sa imbestigasyon, nag-ugat ang pagpangulata sa pulis human nasuta sumala pa niini nga nagluib ang kapuyo. I Richel Gubalani

Leave a Reply

Your email address will not be published. Required fields are marked *