Sangko sa langit ang kalipay nga gibati sa usa ka inahan human nga nag top 1 ang iyang anak nga si Patrolwoman Ana Mae Zafra, nga taga-Veruela, sakop ning lalawigan sa Agusan del Sur sa Public Safety Basic Recruit Course (PSBRC) didto sa Regional Training Center 13 ning milabyang adlaw.
Sumala pa ni Flora Zafra nga malipayon kini sa nakab-ot sa iyang anak nga pangandoy ug nag top-1 sa PSBRC sa “SIDLAK-ALAB” Class of 2020-04 nga maoy nagdala sa mandatus sa organisasyon pagpatuman sa balaud, paglikay ug pagkontrola sa mga kremin, pagmintina sa peace and order, ug pagsiguro sa kaluwasan sa publiko ug internal security uban sa aktibong suporta sa komunidad.
Nasayran nga nakuha ni Patrolwoman Ana Mae Zafra, 92.41% rating samtang si Patrolwoman Felmar Dumaum gikan sa Las Nieves, Agusan del Norte adunay nagsunod kaniya pinaagi sa 91.75%, ug ikatulo si Patrolwoman Manuela Panaligan gikan sa Tagbina, Surigao del Sur nga duna’y 91.49%.
Ang 93 ka mga patrolmen ug 29 ka mga patrolwomen mihuman sa unom ka bulan nga basic training program ug ibalik sila sa Regional Special Training Unit 13 aron mupa-ilalom na usab sa Public Safety Field Training Program (PSFTP).