NAGPASALAMAT ang kapulisan pagsaka sa porsyento sa salig sa publiko sa pagbantay sa seguridad partikular sa Soccsksargen region.
Luyo sa mga natala nga kaso sa pagpamusil sa pipila ka bahin sa rehiyon ug pagkatala sa ubang krimen. Matud ni Police Brig. Gen. Jimili Macaraeg, director sa Police Regional Office (PRO) 12 dako og partisipasyon ang publiko sa pagpabilin sa kahapsay ug kalinaw sa tibuok rehiyon.
Dugang ni Macaraeg, luyo sa maong mga insidente miubos ang ihap sa kriminalidad nga natala sa matag presinto.
Apan gisiguro niini nga padayon ang lihok sa kapulisan aron mas mapalambo ang pagbantay sa seguridad sa tibuok region, butyag sa opisyal. Kahibaloan nga sa survey sa Mindanao Development Authority (MinDa) atong 2022 gikan sa ‘place of concern’, gikonsidera na ang Mindanao isip safe.
Sa percentage nga gipagula, base sa region-wide study naa na sa 88 porsyento nga ‘safe’ ang Soccsksargen. Samtang naa usab sa 88 porsyento ‘public trust’ o salig nga gihatag sa katawhan sa rehiyon sa mga otoridad. I Richel Gubalani