Nagka-initay sa mga pamahayag ang kampo sa pulis ug mayor dinhe sa syudad sa Cagayan de Oro tungod sa isyu sa granular lockdown.
Gitawag nga “unprofessional” ni Cagayan de Oro City Mayor Oscar Moreno si COCPO-Deputy City Police Director Police Lieutenant Colonel Limuel Gonda.
Kini may kalabutan sa pamahayag ni Lt. Col Gonda nga “uncooperative” matud pa ang mayor sa mga rekumendasyon sa mga Kapulisan nga magpahigayon og granular lockdown aron mapugngan ang pagkatag sa COVID-19 infection sa syudad.
Matud ni Moreno nga daw gustong musulod sa pulitika ang nahisgutan nga police official, ug hagit niini kang Gonda nga moluwat pagkapulis aron mudagan isip politiko.
Una nang mipalag ang COCPO sa report nga gisumiter sa LGU-Cagayan de Oro ngadto sa Local-Inter Agency Task Force nga nag-ingong nagpatuman sa granular lockdown o household containment ang syudad.
Apan gipamugos ni Lt. Colonel Gonda nga niadto lamang nakalabay nga tuig gipatuman ang maong lakang ug sa sa 2nd quarter ning tuig 2021 hangtod sa kasamtangan nga bulan, walay nahitabo nga granular lockdown taliwala sa surge sa COVID-19 cases sa Cagayan de Oro.