Nawad-an og trabaho ang mga empleyado sa usa ka recruitment agency sa Initao, Misamis Oriental human kini gipasirhan sa Department of Migrant Workers.
Nasuta nga illegal nga ga-recruit ang Jonieza Joy Travel & Tours Agency & Consultancy alang sa mga gustong mo-trabaho sa Poland, Czech Republic, Lithuania, Romania, Croatia, Malta, Greece, Canada, UK, Dubai ug Saudi Arabia.
Tungod niini, gipa-kandaduhan ni DMW Assistant Secretary Francis Ron De Guzman uban ni Regional Office-10 OIC-Regional Director Atty. Fidel Macauyag ang giingong recruitment firm.
Ang pagpasira sa kompanya resulta sa gihimong surveillance operation basi sa report sa Filipino community sa Poland kinsa mi-bulgar nga ang maong travel agency ilegal nga gatanyag og trabaho abroad sama sa Welders, Electrician, Locksmiths, Greenhouse Workers, Warehouse Workers, Cleaners, Drivers, Factory Workers, Construction Workers, Plumbers, Service Crew, Cook, Restaurant Manager, Food Attendant, Hotel workers, Waiters/Waitress, Caregivers ug Nursing Assistants.
Kini na ang ika-onse nga establisyemento nga gipasirhan sa DMW ug maoy pinaka-una sa Mindanao.