Kasong paglapas sa Republic Act (RA) 9711 kun Food and Drug Administration Act of 2009 ang atubangon ni Comelec Caraga Regional Director Atty. Francisco Pobe human nadakpan sa gihimong buy bust operation sa mga otoridad diha sa Brgy. Washington, Surigao City kagahapon sa udto.
Sa operisyon, nakompiska ang 500 boxes sa Lianhua Qingwen Jiaonang Capsule nga nagkantidad og P100,000, buy bust money balor P99,000, ug personal nga cellphone.
Gikabutyag ni Perla Alvizo, ang Field Regional Supervisor sa Food and Drug Administration (FDA) Caraga, iligal ang gihimong pagpamaligya sa dinakpan sanglit wala kini kompletong papel gikan sa FDA nga puwedeng mamaligya.
Bugtong gitugtan sa FDA nga mabaligya dinhe sa nasod mao kadtong Lianhua Qingwen Jiaonang Capsule nga dunay English translation.
Nagmalampuson ang operisyon tungod sa pagtinabangay sa mga sakop sa Criminal Investigation and Detection Group (CIDG) Surigao del Norte ug Surigao City Police Station.